Prokuroria e Tiranës u ka sekuestruar “grupit të kredive të këqija” shumën prej 10 milionë eurosh. Sipas një dokumenti të siguruar nga “weblajm”, paratë që personat e marrë si të pandehur kanë fituar nga kreditë e këqija, i kanë investuar në banka si llogari investimi ose obligacione thesari. Siç duket edhe nga të dhënat e tabelës, investimet janë bërë në bankat ku këta anëtarë kanë blerë kredi të këqija, e më pas ato para që u kanë marrë qytetarëve, i kanë investuar po në këto banka.
Por në cilat banka janë bërë investimet?
Nga hetimet e Prokurorisë së Tiranës është zbuluar se ka qenë Banka Kombëtare Tregtare, ajo që i ka shitur kreditë grupit. Më pas, ka qenë Elda Ibro, ajo që ka investuar paratë në BKT në mënyrë të paligjshme në formë obligacionesh. Përveç bashkëshortes së tij, investimet në BKT ka pasur edhe i ndjeri Olsi Ibro, por edhe Arben Meksuti.
Pjesë e dosjes që po heton SPAK
Në kuadër të procedimit penal nr.3624/2024, me vendimin e Prokurorit për sekuestrimin e llogarive, të datës 29.05.2024, është vendosur sekuestrimi i llogarive bankare, të shtetasve Arben Konstandin Meskuti, dtl. xxxxx, Ernela Eduart Cuberi, dtl. xxxx, Olsi Esat Ibro, dtl. xxxxx, Elda Bukurosh Ibro, dtl. xxxxx, subjektit “Final”, shpk, subjektit “Micro Credit Albania” sha, personit fizik Ernela Cuberi, shtetasit Albert Gega, personit fizik Albert Gega, shtetasit Andis Gjoka, Vasil Bakallbashi, si më poshtë
Pak muaj më parë, Micro Credit Albania dhe Final, të dyja shoqëritë e mbledhjes së borxheve e kredive të këqija u vendosën nën sekuestro me urdhër të Prokurorisë së Tiranës. Mbi shoqëritë rëndon vepra penale e “mashtrimit me pasoja të rënda dhe kryer më shumë se një herë dhe në bashkëpunim” dhe për “pastrim të produkteve të veprës penale”. Megjithatë, deri më tani, nga Prokuroria e Tiranës nuk jepen sqarime se paratë e kujt janë “pastruar” përmes kësaj kompanie që tashmë është nën sekuestro. Nga hetimet, Prokuroria ka dalë në përfundimin se MCA dhe Final, duke bashkëpunuar me shoqërinë “ADCA” dhe me disa shoqëri të tjera përmbarimore kanë krijuar një skemë mashtruese për të zhvatur dhjetëra milionë euro nga qytetarët.
