Paradë e madhe ushtarake për 80 vjetorin e çlirimit nga Japonia. Ushtarët kinezë për herë të parë të buzëqeshur, një mesazh për SHBA
Në një paradë madhështore ushtarake në Tienanmen, Kina prezantoi një arsenal të avancuar teknologjik: raketa hipersonike dhe balistike, dronë të çdo madhësie, robotë dhe nëndetëse të gjurmuara, avionë luftarakë të padukshëm për radarët dhe madje edhe topa lazeri. Shumë prej tyre u shfaqën për herë të parë dhe janë tashmë në përdorim nga Ushtria Popullore. Kjo paradë force përkon me përvjetorin e fitores ndaj imperializmit japonez në vitin 1945 dhe shërben si një mesazh politik që pozicionon Kinën krah Rusisë dhe Koresë së Veriut kundër Perëndimit, të cilin e cilëson si “bullizues” dhe “fashistë të mijëvjeçarit të tretë”.
Në tribunën e nderit, presidenti Xi Jinping ishte i rrethuar nga Vladimir Putin dhe Kim Jong-un, si dhe nga liderë të tjerë si presidenti iranian Pezeshkian dhe ai bjellorus Lukashenko, ndërsa të vetmit evropianë do janë Fico i Sllovakisë dhe ministri i Jashtëm hungarez Szijjarto. Analistët e quajnë këtë grup “Aleanca e çrregullimit” ose “Kuarteti i kaosit”, duke theksuar ambicien për të ndërtuar një rend botëror alternativ me Azinë në qendër.
Arsenali i ekspozuar është fryt i bashkëpunimit mes Kinës dhe Rusisë, ku rusët kanë ndarë përvojën e tyre nga fronti ukrainas për të ndihmuar kinezët në zhvillimin e sistemeve të reja “hi-tech”, pra të teknologjisë së lartë. Objektivi kryesor mbetet pushtimi i Tajvanit, duke penguar ndërhyrjen e flotës dhe aviacionit amerikan. Në paradë u shfaqën raketa si YJ-19, të afta të godasin aeroplanmbajtëset amerikane me shpejtësi 6 mijë km/h, si dhe dronë detarë që mund të presin kabllot digjitale nën ujë.
Kina prezantoi gjithashtu një avion luftarak të drejtuar nga inteligjenca artificiale, që pretendon të tejkalojë performancën e avionëve me pilotë njerëzorë. Mjetet për zbarkimin e parë në Tajvan janë të gjitha pa ekuipazh (“wúrén”), duke ndjekur modelin e luftës me dronë të përdorur në Ukrainë. Këto mjete do të drejtohen nga algoritme të inteligjencës artificiale, duke krijuar një ritëm të shpejtë sulmi.
Për mbështetje ajrore, janë prezantuar sisteme të reja kundërajrore me mikro-raketa dhe topa lazeri, të testuara në betejën e Kurskut. Po ashtu, u shfaqën armë hapësinore për të shkatërruar satelitët dhe për të ndërprerë sinjalet, siç ndodhi me GPS-in e avionit të Ursula von der Leyen.
Parada ishte edhe një ekspozitë tregtare: armët kineze po fitojnë treg për shkak se Rusia nuk mund t’i eksportojë, Europa prodhon ngadalë dhe SHBA nuk ofron besueshmëri, përveçse ka çmime të larta. Kjo është një mundësi e artë për industrinë ushtarake kineze që e shndërron ndikimin ekonomik në ndikim politik.
Megjithatë, vëzhguesit perëndimorë theksojnë dobësinë kryesore: faktorin njerëzor. Ushtria Popullore nuk ka përvojë në konflikte reale. Gjenerali australian Mick Ryan vuri në dukje se Kina duhet të përmirësojë urgjentisht cilësinë e stërvitjes ushtarake. Edhe trupat e Koresë së Veriut kanë ndryshuar taktikat pas humbjeve të mëdha. Një ndryshim i dukshëm te ushtarët kinezë është se tani, për herë të parë, ata sfilojnë duke buzëqeshur, një mesazh sigurie dhe besimi në fitore për qytetarët dhe aleatët/ La Repubblica
