Janë zbuluar detaje të reja për vrasjen e dyfishtë të ndodhur më 5 tetor në kampingun “Ammos” në Finikounda të Greqisë, ku humbën jetën pronari grek dhe punëtori i tij shqiptar, që ishte edhe mik i afërt i familjes. Hetimet kanë nxjerrë në dritë një element të ri: një testament i përpiluar vetëm tre ditë para ngjarjes, i cili po ngre dyshime të reja për motivet e krimit.
Sipas mediave greke, pronari kishte hartuar një dokument të detajuar për ndarjen e pasurisë së tij, ku pjesën më të madhe ia linte nipit, person i pranishëm në momentin e vrasjes. Në testament, ai kishte përfshirë edhe punonjësin shqiptar, duke i lënë gjysmën e një parcele toke dhe një shumë prej 200 mijë eurosh, në shenjë mirënjohjeje për besnikërinë dhe miqësinë shumëvjeçare.
Në dokument përmenden gjithashtu motra e pronarit dhe djali i saj, të cilëve u takonin nga 100 mijë euro secilit, në rast se prona do të shitej.
Testamenti nis me frazën domethënëse: “Unë po shkruaj testamentin tim në rast vdekjeje të papritur,”
duke treguar se 68-vjeçari kishte ndjerë frikë për jetën e tij ditët para se të vritej.
Ngjarja ndodhi të dielën në mbrëmje, kur një person i armatosur dhe me fytyrën e mbuluar hyri me forcë në recepsionin e kampingut, ku ndodheshin pronari dhe kujdestari i tij shqiptar. Ai qëlloi për vdekje pronarin, ndërsa vrau edhe punëtorin shqiptar që tentoi të largohej.
Në momentin e ngjarjes ishte i pranishëm edhe nipi i pronarit, i cili arriti të shpëtonte. Ai po merret në pyetje nga policia si dëshmitar kyç.
Një pronar karburanti në zonë ka deklaruar se i dyshuari kryesor është parë duke kaluar me motor në drejtim të Pyrgos, duke e përshkruar si person me lëkurë të errët, shtat të shkurtër dhe trup të dobët, ndërsa nipi i viktimës ka dhënë një përshkrim të ndryshëm – një person me lëkurë të çelët dhe flokë të verdhë.
Autoritetet greke po hetojnë mundësinë që pas vrasjes të fshihet një motiv pasurie, lidhur me testamentin e nënshkruar pak ditë para krimit, ndërsa kërkimet për autorin e dyshuar vazhdojnë.
