Një 48-vjeçar është ekstraduar nga Spanja në Shqipëri pasi ishte në kërkim ndërkombëtar.
Robert Isaku ndodhej nën masën arrest në burg nga Gjykata e Dibrës.
Në qershor 2018 ai kishte shpërthyer me eksploziv një automjet në Bulqizë, duke shkaktuar vetëm dëme materiale. Automjeti ishte në pronësi të një personi tjetër dhe përdorej nga pronari i lavazhit ku ndodhi shpërthimi, i cili pati si pasojë vetëm dëme materiale.
Njoftimi i policisë:
Shkatërroi me lëndë plasëse, një automjet, në një lavazh në Bulqizë, ekstradohet nga Spanja, 48-vjeçari.
Si rezultat i bashkëpunimit të vazhdueshëm ndërmjet specialistëve të Interpol Tiranës dhe specialistëve të Interpol Madridit, gjatë kësaj faze të operacionit ndërkombëtar të koduar “The Wanted”, u finalizua procedura për ekstradimin nga Spanja, në Shqipëri, të shtetasit R. I., 48 vjeç.
Ky shtetas kërkohej ndërkombëtarisht, sepse Gjykata e Shkallës së Parë e Juridiksionit të Përgjithshëm Dibër i ka caktuar masën e sigurisë “Arrest në burg”, për veprën penale “Shkatërrimi i pronës me eksploziv”, me pasoja të rënda materiale.
Shtetasi R. I. akuzohet se mbrëmjen e datës 29.06.2018, ka shpërthyer me eksploziv, automjetin tip “Audi” në pronësi të shtetasit F. T. dhe në përdorim të pronarit të lavazhit ku ndodhi shpërthimi, shtetasit T. T.
Si pasojë pati vetëm dëme materiale.
