Qeveria shqiptare ende nuk e ka në plan të marrë masa konkrete për të frenuar rritjen e çmimeve të karburanteve. Të paktën, këtë la të kuptohet ministrja e Ekonomisë dhe Inovacionit, Delina Ibrahimaj, në deklaratën për mediat pas mbledhjes së Këshillit të Ministrave.
Ajo njoftoi sërish se qeveria do të mbetet vetëm në aspektin e monitorimit të situatës dhe paralajmëroi se Bordi i Transparencës mund të rikthehet në rast të rritjeve të mëtejshme.
Por ky “monitorim” i qeverisë, që përkthehet në barrë për qytetarët çdo ditë me çmimet e reja, tregon edhe dallimin me vendet e rajonit, të cilat kanë marrë masa konkrete për të mbrojtur qytetarët.
E fundit është qeveria greke, e cila njoftoi masa emergjente për të frenuar rritjen e çmimeve dhe fenomenet e fitimeve të pajustifikuara, në kushtet e tensioneve ndërkombëtare dhe krizës në Lindjen e Mesme.
Masa kryesore është vendosja e një tavani mbi marzhin e fitimit për karburantet, ushqimet dhe mallrat bazë të konsumit. Në sektorin e karburanteve, marzhi i fitimit në tregtinë me shumicë nuk do të mund të kalojë 5 cent për litër, ndërsa për pikat e shitjes me pakicë, kufiri vendoset në 12 cent për litër. Masat do të jenë në fuqi për tre muaj.
Në të njëjtën mënyrë kanë vepruar Kosova dhe Kroacia, ndërsa qeveria e Shqipërisë vazhdon të monitorojë situatën.
Duke iu përgjigjur pyetjes pse çmimi i naftës në Shqipëri rezulton më i lartë se në disa vende të rajonit, ministrja sqaroi se një nga faktorët kryesorë është mënyra e aplikimit të taksës së qarkullimit. Sipas saj, ndryshe nga vendet e tjera të rajonit ku kjo taksë paguhet mbi automjetin, në Shqipëri ajo paguhet mbi karburantin.
Sa i përket ndërhyrjeve të mundshme në taksa të tjera, si akciza, që është më e madhja me rreth 40 lekë, ose taksa e karbonit, ministrja u justifikua se aktualisht nuk ka një situatë që kërkon masa të tilla.
Deri sa të vijë momenti që ministrja dhe qeveria të bindën se situata kërkon ndërhyrje, ia rikujtojmë se rroga e shumicës së shqiptarëve nuk është sa e zyrtarëve që të përballojë rritjen e çmimeve për një kohë të gjatë. Të paktën, qeveria mund të reagojë në nivelin e vendeve të rajonit, të cilat, edhe pse kanë standarde më të larta jetese, mbrojnë qytetarët nga kostot e larta.
