Gjykata e Tiranës ka caktuar masën e sigurisë “arrest me burg” për Granit Pepnikën, i shpallur në kërkim ndërkombëtar në kuadër të dosjes së bujshme të call centerave, që dyshohet se kanë mashtruar qindra qytetarë europianë dhe kanë shkaktuar një dëm financiar që llogaritet mbi 50 milionë euro.
Vendimi vjen pas urdhrit të arrestit të firmosur nga prokuroria, ndërsa hetimet po zbulojnë gjithnjë e më shumë detaje mbi një rrjet të organizuar mashtrimi që, sipas autoriteteve, operonte prej vitesh nga Shqipëria drejt vendeve të Bashkimit Europian.
Sipas dosjes hetimore, skema funksiononte përmes call centerave të organizuar në mënyrë profesionale, ku operatorët komunikonin në gjermanisht, italisht dhe anglisht me qytetarë europianë, duke u prezantuar si këshilltarë financiarë apo përfaqësues platformash investimi.
Hetuesit dyshojnë se viktimat joshesin përmes platformave të rreme online, ku u premtoheshin fitime të mëdha nga investimet në bursë, kriptovaluta apo tregje financiare. Në shumë raste përdornin identitete false, pseudonime dhe profile të fabrikuara për të krijuar besim tek personat që kontaktonin.
Sipas autoriteteve, rrjeti kishte ngritur një strukturë që funksiononte si kompani legjitime, me ndarje rolesh, operatorë të trajnuar dhe sisteme të sofistikuara komunikimi, ndërsa paratë dyshohet se transferoheshin përmes llogarive bankare dhe kriptovalutave për të fshehur gjurmët.
Nga të dhënat e mbledhura deri tani, dyshohet se qindra qytetarë nga vende të ndryshme të Europës kanë rënë pre e mashtrimit, ndërsa dëmi ekonomik i shkaktuar llogaritet të kalojë 50 milionë euro./JOQ
