Inteligjenca artificiale mund të ketë ndihmuar në zgjidhjen e një prej problemeve më të vështira të matematikës, por rezultati ende nuk është konfirmuar nga shkencëtarët.
Një nga problemet më të famshme të matematikës, i njohur si problemi i Navier-Stokes, mund të jetë më pranë zgjidhjes.
Matematicienët Tristan Buckmaster dhe Levent Alpöge kanë punuar për këtë problem dhe gjatë kërkimeve të tyre kanë përdorur edhe inteligjencën artificiale. Sipas tyre, modelet e AI-së i kanë ndihmuar të bëjnë një përparim të rëndësishëm në studimin e mënyrës sesi lëvizin uji, ajri dhe lëngje të tjera.
Por për çfarë problem bëhet fjalë?
Shkencëtarët përpiqen të kuptojnë dhe të parashikojnë sesi lëvizin uji, ajri dhe lëngjet e tjera. Pyetja e madhe është: a vazhdon gjithçka të ecë normalisht, apo në një moment lëvizja mund të bëhet aq e fortë sa të dalë jashtë kontrollit dhe shpejtësia të rritet pafund?
Ky mister ka mbetur i pazgjidhur për më shumë se 20 vjet dhe është një nga 7 problemet e mëdha të matematikës të shpallura nga Clay Mathematics Institute që kanë lënë në hije edhe mendjet më të ndritura të botës.
Për zgjidhjen e problemit është vendosur një çmim prej 1 milion dollarësh.
Sipas Buckmaster, përdorimi i AI-së ka ndihmuar shumë në avancimin e punës. Gjatë kërkimit janë përdorur modele të ndryshme, përfshirë edhe modele të OpenAI dhe Claude të Anthropic.
Por këtu ka nisur edhe debati. OpenAI ka theksuar rolin e modeleve të saj në këtë përparim, ndërsa Buckmaster ka kundërshtuar idenë se AI e ka bërë punën pothuajse e vetme.
Sipas tij, puna dhe kontributi i matematicienëve kanë qenë shumë më i madh nga se paraqitet.
Për momentin, askush nuk mund të thotë se problemi i Navier-Stokes është zgjidhur përfundimisht. Prova duhet të kontrollohet nga matematicienë të tjerë dhe të kalojë një proces të gjatë verifikimi.
Nëse rezultati konfirmohet, do të ishte një arritje e jashtëzakonshme për matematikën dhe një nga shembujt më të rëndësishëm të përdorimit të inteligjencës artificiale në shkencë.
Dhe pyetja më e madhe që shtrohet është: nëse AI ndihmon në zgjidhjen e një problemi që njerëzit nuk e kanë zgjidhur për dekada, kujt i takon merita – njeriut, AI-së apo të dyve?
