Marina e Shteteve të Bashkuara zhvilloi për katër muaj një operacion sekret për çminimin e Ngushticës së Hormuzit, një prej korridoreve më të rëndësishme të transportit të naftës në botë.
Në operacion morën pjesë zhytës të njësive elitare Navy SEALs, të mbështetur nga mjete robotike, nëndetëse pa pilot dhe sisteme të avancuara sonar. Pjesa më e madhe e misioneve u krye gjatë natës.
Sipas raportimeve, fillimisht sistemet pa pilot lokalizonin minat në fundin e detit. Më pas, në disa raste, zhytësit duhej t’u afroheshin eksplozivëve dhe të vendosnin ngarkesa për shkatërrimin e tyre.
“Zakonisht më pas duhet një zhytës i marinës që të futet në ujë, t’i afrohet minës, të vendosë një ngarkesë mbi të dhe ta shkatërrojë”, shpjegoi për Financial Times ish-kapiteni i Marinës amerikane Bill Hamblet.
Për lokalizimin e minave u përdorën edhe mjete sipërfaqësore pa pilot dhe sisteme nënujore të pajisura me sonar, të afta për të skanuar fundin e detit.
Pavarësisht rrezikut të operacionit, nuk është raportuar asnjë viktimë amerikane.
Organizata Ndërkombëtare Detare kishte vlerësuar në qershor se rreth 80 mina ishin vendosur përgjatë Ngushticës së Hormuzit, një rrugë strategjike për transportin global të energjisë.
Presidenti Donald Trump deklaroi në gusht se minat ishin hequr nga ngushtica.
Megjithatë, mbeten pikëpyetje për sigurinë e plotë të rrugës detare, veçanërisht për shkak të mundësisë së vendosjes së minave të reja.
Kompanitë e transportit dhe ekspertët detarë vlerësojnë se zonat pranë bregdetit të Omanit, ku anijet shoqërohen nga forcat amerikane, ka të ngjarë të jenë pastruar, por ka më pak siguri për pjesën tjetër të ngushticës.
Kërcënimi nga minat, së bashku me sulmet me raketa dhe dronë, ka bërë që trafiku i dukshëm detar në Hormuz të mbetet në nivele të ulëta.
