Gjeneza e dosjes “Veliaj” lidhet me një denoncim të depozituar në SPAK në korrik 2023, me emrin “Nesti Angoni”. Materiali ngrinte dyshime për marrëdhënie financiare mes Erion Veliajt, Ajola Xoxës dhe kompanive të ndërtimit, por hetimi do të niste mes një pikëpyetjeje të pazakontë: personi me këtë emër nuk rezultonte të ekzistonte në regjistrin e Gjendjes Civile, thuhet ne Inside Story.
Pikërisht kjo është kthyer në një nga pikat e debatit mbi mënyrën se si nisi procedimi penal nr. 27 i vitit 2024. Mbrojtja ka pretenduar gjithashtu se nuk ekziston zarfi përmes të cilit denoncimi është dërguar në SPAK, duke ngritur pyetjen se kush e hartoi dhe kush e futi në sistemin e drejtësisë.
Analisti Arion Sulo e sheh këtë si një element që ngre pikëpyetje serioze mbi zanafillën e hetimit. “Kjo ka nisur me një gjë që nuk ekziston, Nesti Angoni”, u shpreh ai, duke e krahasuar mënyrën e nisjes së historisë me praktikat e vjetra të denoncimeve anonime.
Më tej, hetimi i SPAK-ut u përqendrua te marrëdhëniet financiare të familjes Veliaj. Sipas prokurorisë, kompani që kishin përfituar leje, kontrata apo fonde nga Bashkia e Tiranës kishin krijuar më pas marrëdhënie financiare me subjekte të lidhura me Ajola Xoxën.
Një prej episodeve të përfshira në dosje lidhet me pagesat e kryera përmes Qendrës Harabel. SPAK pretendon se kontratat e qirasë mes Xoxës dhe qendrës ishin fiktive dhe shërbenin për kalimin e parave në llogaritë e saj, ndërsa një tjetër linjë e përshkruar nga prokuroria lidhet me kompaninë “Fusha” dhe një shumë prej rreth 2.6 milionë lekësh.
“Sipas organit procedues, i gjithë mekanizmi që përmendet më lart, i cili nis që nga subjekti tregtar ‘Fusha’ sh.p.k., vijon me kalimin e një sasie të hollash, rreth 2.600.000 lekë, dhe kalimi nga këto të fundit tek destinacioni fundor që rezulton të jetë shtetasja Ajola Xoxa, dëshmon qartë të gjithë rrugën e ndjekur për pastrimin dhe injektimin në sistemin bankar të përfitimeve të paligjshme.”
Në këtë mënyrë, dosja kaloi nga një denoncim me një identitet të dyshimtë në një hetim të gjerë mbi burimin dhe destinacionin e parave, ndërsa vetë mënyra se si u shfaq në SPAK personi “Nesti Angoni” mbetet një nga pikëpyetjet e ngritura nga mbrojtja dhe kritikët e hetimit.
