Një tjetër anëtar i një grupi kriminal që merrej me trafikimin e lëndëve narkotike nga Shqipëria drejt vendeve të Bashkimit Europian është ekstraduar në vendin tonë.
Sipas njoftimit zyrtar, Emri Hysenaj, 39 vjeç, u ekstradua nga Italia pas një operacioni të përbashkët të Drejtorisë së Interpolit në Tiranë me homologët e Interpol Romës.
Hysenaj ishte shpallur në kërkim ndërkombëtar dhe ndaj tij Gjykata e Posaçme (GJKKO) kishte caktuar në prill 2025 masën e sigurisë “arrest në burg” për veprën penale “Trafikim i lëndëve narkotike, kryer në kuadër të grupit të strukturuar kriminal.”
Sipas dosjes hetimore, ai akuzohet se gjatë vitit 2021 ka trafikuar drogë nga Shqipëria në disa shtete të Europës, në bashkëpunim me persona të tjerë që tashmë janë nën hetim apo në ndjekje.
Autoritetet shqiptare theksojnë se bashkëpunimi ndërkombëtar i policisë ka qenë vendimtar për kapjen dhe kthimin në Shqipëri të anëtarëve të rrjeteve kriminale që operojnë jashtë vendit.
