SPAK ka konfirmuar zyrtarisht se Agim Ismaili po hetohet për përgjim të paligjshëm dhe përfshirje në një grup të strukturuar kriminal, në kuadër të hetimeve mbi sulmin kibernetik që goditi adresat elektronike të prokurorëve të posaçëm në mars të vitit 2025. Sipas dyshimeve, ai konsiderohet si personi kryesor që ka orkestruar ndërhyrjen dhe hakerimin e sistemeve të prokurorisë speciale.
Në kohën e sulmit, SPAK kishte dhënë një deklaratë të detajuar mbi ngjarjen, duke sqaruar se infrastruktura kryesore e institucionit nuk ishte prekur. Sipas deklaratës së atëhershme, më 12 mars 2025 u zbulua një ndërhyrje e paligjshme në adresat e email-eve të disa prokurorëve të posaçëm. Falë protokolleve të sigurisë, sistemi i brendshëm i SPAK mbeti i paprekur dhe sulmuesit nuk arritën të siguronin akses në dosjet hetimore.
Nga verifikimet u konstatua se ndërhyrja kishte prekur vetëm një sërë adresash personale të prokurorëve, ndërsa tentativa për të hyrë në email-in e Drejtuesit të Prokurorisë së Posaçme, Altin Dumani, dështoi. Hetimet e zhvilluara me intensitet nga Prokuroria e Posaçme, BKH dhe Sektori i Ekspertizës bënë të mundur identifikimin dhe arrestimin brenda 24 orëve të dy personave: njëri që kreu ndërhyrjen dhe tjetri që shpërndau informacionet tek persona të tretë.
Gjatë operacionit u sekuestruan pajisjet e përdorura dhe skedarët e shkarkuar, ndërsa personat e përfshirë u urdhëruan të mos publikojnë materialet që kishin rënë në posedim të tyre për shkak të sekretit hetimor. SPAK mori gjithashtu në pyetje individë të tjerë që mund të kishin lidhje me autorët e sulmit.
Paralelisht me procedimin penal, SPAK nisi një hetim administrativ të brendshëm, i cili konfirmoi se sistemi i përgjithshëm i IT-së nuk ishte komprometuar. Institucioni njoftoi edhe forcimin e protokolleve të sigurisë për të parandaluar incidente të ngjashme.
Në atë kohë, SPAK deklaronte se nuk kishte asnjë provë që personat e arrestuar kishin bashkëpunuar me staf të brendshëm të institucionit dhe theksonte se ishin marrë të gjitha masat për të mbrojtur dosjet dhe të dhënat e ndjeshme.
Hetimet vijojnë, ndërsa pista kryesore mbetet ekzistenca e një grupi të strukturuar kriminal që kishte synim infiltrimin dhe komprometimin e komunikimit elektronik të prokurorëve të posaçëm.
