Kanë dalë të tjera detaje në lidhje me 18-vjeçaren, Natalia Murtati, e cila është vetëplagosur me armë zjarri në mesnatë, në ambientet e një hoteli në Sauk. Vajza ka qenë vetëm në dhomë të gjumit kur ka marrë armën dhe ka qëlluar veten. Erisjaldo Gjuta, i dashuri i vajzës, dhe Sajmir Gjuta, babai i të dashurit të 18-vjeçares, kanë qenë jashtë dhe kanë dëgjuar të shtënat.
Kur kanë hyrë në dhomë kanë parë vajzën të vetëplagosur dhe kanë thirrur edhe Mirvete Gjutën, nëna e 22-vjeçarit dhe Vladimir Gjutën, xhaxhai i të riut, dhe kanë vendosur që të pastrojnë vendin e ngjarjes. Ata kanë fshehur armën, kanë larë gjakun, ndërsa Mirvete Gjuta dhe Elvir Gjuta, kushëri i 22-vjeçarit, janë nisur me makinë për ta dërguar në spital dhe janë porositur të deklarojnë që “vajzën e kanë gjetur të shtrirë te rrethi i Ekonomikut”.
Pas hetimit, rezultoi se vajza në fakt ishte vetëplagosur në hotelin e tyre.
18-vjeçarja ka deklaruar se ka tentuar dhe herë tjetër të dëmtojë veten duke pirë medikamente. “Kam gabuar në jetë”, ka deklaruar ajo.
Kujtojmë se deri më tani në pranga kanë rënë dy persona, Vladimir Gjuta dhe Mirvete Rexhmati Gjuta.
Ndërkohë, tre të tjerë janë shpallur në kërkim,
Ende në kërkim janë: Sajmir Gjuta, 49 vjeç, Elvir Gjuta, 24 vjeç, si dhe shtetasi Erisjaldo Gjuta 22 vjeç, i dashuri i 18-vjeçares, i cili dyshohet se ka pasur edhe armën me të cilën Natalia Murtati kreu vetëplasgosjen.
Ndërkohë, vijon puna për gjetjen dhe sekuestrimin e armës së zjarrit të përdorur në ngjarje.
