Kryeministri Edi Rama në konferencën për media mori në mbrojtje edhe projektet e tre inceneratorëve, të Tiranës, Fierit dhe Elbasanit.
Rama u pyet nga gazetarët për draft-dokumentin e “Politikave-Prioritare” të qeverisë shqiptare, të zbuluar nga BIRN, që parashikon investimin për dy vitet e ardhshme edhe të 113 milionë eurove për menaxhimin e mbetjeve për qarkun e Fierit dhe Elbasanit, pavarësisht dy kontratave me vlerë 50 milionë euro për ndërtim inceneratorësh.
Investimi për periudhën 2024-2026 rendit si projekte “Unike me rëndësi kombëtare” të investimeve publike, krijimin e zonave funksionale për mbetjet në Elbasan dhe Fier, edhe pse dy inceneratorët janë nën gjykim për veprat penale të korrupsionit dhe pastrimin e parave.
Rama u rrek të mos komentonte draf-dokumentin, por mbrojti kontratat e lidhur me “Integrated Energy” të Klodian Zotos e Mirel Mërtirit, për tre djegësat, si projekte të cilat kanë bërë Shqipërinë edhe më të pastër, pavarësisht se ato janë arsyeja pse ish-numri dy i qeverisë së tij, Arben Ahmetaj është shpallur në kërkim ndërkombëtar.
Sipas Ramës fakti që ka abuzues dhe vjedhje në këto projekte, nuk e përjashton punën e mirë që qeveria e tij ka bërë me mbetjet.
Duke iu referuar ish ministrit të Mjedisit Lefter Koka Alqi Bllako e të tjerë të cilët po gjykohen se kanë përfituar miliona nga këto projekte Rama tha se SPAK e GJKKO duhet të vërë drejtësi.
“Impianti i Elbasanit funksionojnë dhe është pronë e bashkisë së Elbasanit. Ata që kanë abuzuar nuk e rrëzojnë fare qëllimin e lartë të pastrimit të Shqipërisë nga plehrat që e kishin mbytur deri në fut dhe as rezultatet që janë evidente. Edhe në Tiranë do të vazhdojë të bëhet me para se përndryshe nuk funksionon. Puna për të pastruar Shqipërinë kushton le të hidhen përjetë kushdo. Kushton dhe do të kushtojë gjithmonë e më shumë,jo më pak. Është bukur të kesh miliona turistë por do të thotë që të jenë miliona e miliona konsumatorë më shumë dhe miliona mbetje.
Prandaj kjo punë do të vazhdojë. Ndërkohë pjesa tjetër duhet të vijojë deri në fund po e bën SPAK dhe gjykata speciale ti nxjerrin të gjithë ujin e zi kësaj historie por gjithë ai ujë i zi i asaj historie nuk e bën nul punën kolosale që është bërë ku këto nisma kanë pasur rolinb e tyre vendimtar që Tirana, Elbasani e Fieri janë sot ndryshe. Është një shprehje në italisht: Nuk duhet hedhur bebja bashkë me ujin e ndotur. Uji i ndotur hidhet dhe bebja rritet“, tha Rama.
